អតីតតារា Spurs ជឿថា De Zerbi ត្រូវការកីឡាករ Manchester City ដើម្បីលើកកម្រិតក្រុម
អត្ថបទសរសេរដោយ Danny • 5 views
អតីតខ្សែបម្រើការពារដ៏រឹងមាំរបស់ក្រុមខកខានពានរង្វាន់យូរឆ្នាំ Tottenham Hotspur លោក Sandro បានចេញមុខជម្រុញឱ្យក្លិបចាស់របស់លោក ព្យាយាមធ្វើគ្រប់វិធីដើម្បីនាំយកខ្សែប្រយុទ្ធស្លាប Savinho របស់ក្រុម Manchester City មកកាន់ទឹកដីឡុងដ៍ ដើម្បីជាគ្រឹះក្នុងការកសាងក្រុមឡើងវិញក្រោមការដឹកនាំរបស់លោក Roberto De Zerbi។
បន្ទាប់ពីលោក De Zerbi មកស្រោចស្រង់ក្រុមឱ្យគេចផុតពីតំបន់ធ្លាក់ថ្នាក់នៃលីគកំពូល Premier League យ៉ាងព្រឺព្រួច (ឈ្នះ ៣ ស្មើ ២ ចាញ់ ២ ក្នុងចំណោម ៧ ប្រកួតចុងក្រោយ) ក្រោយចូលកាន់តំណែងជំនួសតំណែងចាស់កាលពីចុងខែមីនា លោក Sandro បានមើលឃើញថា ក្លិបមានចំណុចខ្វះខាតធំៗចំនួន ៣ ដែលត្រូវតែបំពេញក្នុងទីផ្សារដោះដូរកីឡាកររដូវក្តៅនេះ រួមមាន៖ តំបន់ប្រយុទ្ធកណ្តាល ខ្សែប្រយុទ្ធស្លាប និងខ្សែការពារកណ្តាល។ អតីតតារាឆ្នើមសញ្ជាតិប្រេស៊ីលរូបនេះបានបញ្ជាក់ប្រាប់ប្រភព Stake ថា៖ «ខ្ញុំគិតថាយើងត្រូវពង្រឹងតំបន់ប្រយុទ្ធ ព្រោះកីឡាករមួយចំនួនប្រហែលជានឹងចាកចេញ ដូចជា Richarlison ជាដើម... ខ្ញុំគិតថាយើងគួរតែផ្តោតលើកីឡាករប្រភេទដូចជា Savinho»។
Savinho ដែលធ្លាប់បង្ហាញខ្លួនយ៉ាងលេចធ្លោនៅ Girona (ស៊ុតបាន ១១ គ្រាប់) មុនពេលផ្ទេរមក Man City ក្នុងតម្លៃ ២៥ លានអឺរ៉ូ រូបគេបានប្រមូលពានរង្វាន់ក្នុងស្រុកជាច្រើនដូចជា FA Cup, League Cup និង Community Shield រួចជាស្រេចទៅហើយ។ ក្រៅពីតំបន់ប្រយុទ្ធ លោក Sandro ក៏បានក្រើនរំលឹកឱ្យក្លិបត្រៀមរកដកទ័ពការពារថ្មីមកជំនួសលោក Cristian Romero ដែលមានពាក្យចចាមអារ៉ាមចង់ចាកចេញផងដែរ និងបានស្នើសុំឱ្យថ្នាក់ដឹកនាំ Spurs ផ្តល់ពេលវេលា ក៏ដូចជាកញ្ចប់ថវិកាពេញលេញឱ្យលោក De Zerbi ក្នុងការជ្រើសរើសកីឡាករតាមទស្សនវិជ្ជាបាល់ទាត់ប្រយុទ្ធដ៏ឆ្លាតវៃរបស់លោក។
