ទឹកចិត្តប្រធានក្រុម! Marquinhos ចេញមុខលួងលោម Gabriel Magalhaes ក្រោយខកចិត្តខ្លាំងក្នុងវគ្គផ្តាច់ព្រ័ត្រ Champions League!
អត្ថបទសរសេរដោយ Danny • 3 views
លោក Marquinhos ប្រធានក្រុម PSG បានបង្ហើបពីពាក្យសម្ដីដែលលោកបាននិយាយទៅកាន់ Gabriel Magalhaes បន្ទាប់ពីខ្សែការពាររបស់ក្រុម Arsenal រូបនេះ បានស៊ុតប៉េណាល់ទីខកខាន ក្នុងវគ្គផ្តាច់ព្រ័ត្រពានរង្វាន់ Champions League 2026 នៅទីក្រុង Budapest ដែលបានបញ្ចប់ទៅដោយភាពខកចិត្តបំផុតសម្រាប់ក្រុមកាំភ្លើងធំ។
ខណៈពេលដែលមិត្តរួមក្រុម PSG ភាគច្រើនកំពុងរត់ទៅអបអរសាទរជ័យជម្នះជើងឯក លោក Marquinhos បែរជារត់ទៅរក Gabriel មុនគេ ដើម្បីផ្តល់ការលើកទឹកចិត្តដល់មិត្តរួមជម្រើសជាតិប្រេស៊ីលរបស់លោក។ ខ្សែការពារវ័យចំណាស់រូបនេះបានសារភាពថា ពេលឃើញ Gabriel ឈរម្នាក់ឯងភ្លាម វាបានធ្វើឱ្យលោកនឹកឃើញដល់ការឈឺចាប់ផ្ទាល់ខ្លួនកាលពីព្រឹត្តិការណ៍ World Cup 2022 ដែលរូបលោកក៏ធ្លាប់ស៊ុតប៉េណាល់ទីខកខានឱ្យក្រុមជម្រើសជាតិ Brazil ដូចគ្នា។ ថ្លែងពីជំរំហ្វឹកហាត់ លោក Marquinhos បានរៀបរាប់ថា លោកបានប្រាប់ទៅ Gabriel ឱ្យរក្សាភាពរឹងមាំ និងលើកក្បាលឱ្យខ្ពស់ ព្រោះរូបគេបានបង្ហាញទម្រង់លេងដ៏អស្ចារ្យពេញមួយរដូវកាលរួចទៅហើយ ដោយលោកថែមទាំងចាត់ទុក Gabriel ថាជាខ្សែការពារកណ្តាលដ៏ល្អបំផុតនៅលើពិភពលោកនាថ្នាក់រដូវកាលនេះទៀតផង។
បច្ចុប្បន្ន ខ្សែការពារទាំងពីររូបបានវិលត្រឡប់មកជួបជុំគ្នានៅក្នុងក្រុមជម្រើសជាតិ Brazil វិញហើយ ដោយទុកការប្រកួតប្រជែងនៅកម្រិតក្លិបមួយឡែកសិន។ លោក Marquinhos សង្ឃឹមថា Gabriel នឹងអាចជម្រុះការខកចិត្តនេះបានយ៉ាងឆាប់រហ័ស ដើម្បីត្រៀមខ្លួនសម្រាប់យុទ្ធនាការ World Cup ខាងមុខ ដែលក្រុមជម្រើសជាតិ Brazil ត្រូវស្ថិតនៅក្នុង Group C ជាមួយក្រុម Morocco, Haiti និង Scotland។
