Gabriel Jesus ស្ថិតក្នុងបញ្ជីចង់បានរបស់ Everton ប៉ុន្តែតម្លៃខ្លួនកីឡាកររូបនេះនៅតែជាបញ្ហា
អត្ថបទសរសេរដោយ Danny • 4 views
Everton កំពុងពិចារណាធ្វើការផ្ទេរដ៏គួរឱ្យភ្ញាក់ផ្អើលមួយនៅរដូវក្តៅនេះ ដោយបានដាក់ខ្សែប្រយុទ្ធ Gabriel Jesus របស់ Arsenal ជាគោលដៅសំខាន់សម្រាប់យកមកពង្រឹង និងដោះស្រាយបញ្ហាការរកគ្រាប់បាល់នៅតំបន់ប្រយុទ្ធ។
យោងតាមសារព័ត៌មាន Football Insider បានឱ្យដឹងថា ថ្នាក់ដឹកនាំ Everton ជឿជាក់ថា បទពិសោធន៍របស់ Jesus នៅក្នុង Premier League អាចជួយលើកកម្ពស់គុណភាពក្រុមបានយ៉ាងច្រើន។ ទោះជាយ៉ាងណា ប្រតិបត្តិការនេះមិនមែនជារឿងងាយស្រួលនោះទេ ព្រោះ Everton មិនមានបំណងបង់តម្លៃ ២០ លានផោន តាមការទាមទាររបស់ Arsenal ឡើយ។ ក្រៅពីតម្លៃផ្ទេរ កីឡាករវ័យ ២៩ ឆ្នាំរូបនេះ ក៏ត្រូវទទួលយកការកាត់បន្ថយប្រាក់ខែយ៉ាងច្រើនផងដែរ ប្រសិនបើចង់ផ្ទេរមកកាន់ទឹកដី Merseyside។ ជាងនេះទៅទៀត ប្រវត្តិរបួសរបស់ Jesus ក៏កំពុងធ្វើឱ្យ Everton មានការប្រុងប្រយ័ត្នខ្លាំងណាស់ដែរ បន្ទាប់ពីរូបគេបានជួបរបួស ACL ធ្ងន់ធ្ងរ រហូតបានចាប់ផ្តើមជាជម្រើសដំបូងត្រឹមតែ ៣ ប្រកួតប៉ុណ្ណោះ ក្នុងចំណោម ១៤ ប្រកួតកាលពីរដូវកាលមុន។
ខាងភាគី Arsenal ក្រោមការដឹកនាំរបស់លោក Mikel Arteta ត្រូវបានគេរាយការណ៍ថា មានឆន្ទៈក្នុងការអនុញ្ញាតឱ្យ Jesus ចាកចេញដើម្បីកែសម្រួលតំបន់ប្រយុទ្ធថ្មី។ ប៉ុន្តែ Everton ត្រូវប្រឈមមុខនឹងការប្រកួតប្រជែងពីក្លិបធំៗផ្សេងទៀតដូចជា AC Milan, Juventus និង Palmeiras ដែលកំពុងតាមដានស្ថានភាពនេះដូចគ្នា។ ប្រសិនបើការចរចាជាមួយ Gabriel Jesus មិនអាចឈានដល់កិច្ចព្រមព្រៀងបានទេ គ្រូបង្វឹកលោក David Moyes អាចនឹងបង្វែរការចាប់អារម្មណ៍ទៅលើខ្សែប្រយុទ្ធ Taty Castellanos ជាជម្រើសបម្រុងជំនួសវិញ។
