Jose Mourinho ត្រៀមវិលត្រឡប់ទៅដឹកនាំ Real Madrid វិញ បន្ទាប់ពីក្លិបយក្សអេស្ប៉ាញមួយនេះ បង់ប្រាក់ផ្តាច់កុងត្រាឲ្យ Benfica រួចរាល់
អត្ថបទសរសេរដោយ Danny • 4 views
Jose Mourinho កំពុងខិតជិតការវិលត្រឡប់ទៅកាន់កៅអីគ្រូបង្វឹករបស់ Real Madrid សារជាថ្មី បន្ទាប់ពីចាកចេញពីក្លិបអស់រយៈពេល ១៣ ឆ្នាំ។ គ្រូបង្វឹកជនជាតិព័រទុយហ្គាល់រូបនេះ ត្រូវបានជ្រើសរើសឲ្យដឹកនាំគម្រោងថ្មីនៅកីឡដ្ឋាន Santiago Bernabeu ខណៈ Real Madrid បានបង់ថ្លៃផ្តាច់កុងត្រារបស់គាត់ជាមួយ Benfica រួចហើយ។
តាមការចុះផ្សាយរបស់ Sky Sport Italia បានឲ្យដឹងថា Real Madrid បានបង់ប្រាក់ចំនួន ៣ លានអឺរ៉ូ ដើម្បីបញ្ចប់កុងត្រារបស់ Mourinho ជាមួយ Benfica កាលពីថ្ងៃចន្ទ ទី១៨ ខែឧសភា។
ការផ្លាស់ប្តូរនេះ គឺជាជំហានសំខាន់មួយរបស់ប្រធានក្លិប Florentino Perez ក្នុងការនាំយក “Special One” ត្រឡប់មកកាន់ទីក្រុងម៉ាឌ្រីដវិញ។ Mourinho ឥឡូវនេះ អាចចុះកុងត្រាជាផ្លូវការជាមួយ Real Madrid បានហើយ បន្ទាប់ពីធ្លាប់ដឹកនាំក្លិបចន្លោះឆ្នាំ ២០១០ ដល់ ២០១៣ និងឈ្នះពាន La Liga, Copa del Rey និង Supercopa de Espana។
ការចរចារវាង Real Madrid និងភ្នាក់ងាររបស់គាត់ Jorge Mendes ត្រូវបានរាយការណ៍ថា បានដំណើរការយ៉ាងលឿនក្នុងរយៈពេលប៉ុន្មានថ្ងៃចុងក្រោយនេះ។ ទោះបីជា Mourinho ធ្លាប់និយាយថា គាត់អាចបន្តនៅប្រទេសព័រទុយហ្គាល់ក៏ដោយ ប៉ុន្តែឱកាសក្នុងការត្រឡប់ទៅដឹកនាំ Real Madrid វិញ គឺពិបាកបដិសេធខ្លាំងណាស់សម្រាប់គាត់។
មានការរាយការណ៍ថា Mourinho បានព្រមព្រៀងផ្ទាល់មាត់លើកុងត្រារយៈពេល ២ ឆ្នាំ ជាមួយ Real Madrid ហើយ គ្រាន់តែរង់ចាំការប្រកាសជាផ្លូវការប៉ុណ្ណោះ។
គាត់ក៏បាននិយាយអំពីបញ្ហានេះផងដែរថា៖ “ខ្ញុំមិនទាន់បានឮអ្វីផ្ទាល់ពី Real Madrid នៅឡើយទេ ប៉ុន្តែយើងទាំងអស់គ្នាមិនមែនល្ងង់ទេ។ មានការពិភាក្សារវាង Jorge Mendes, ប្រធានក្លិប និងថ្នាក់ដឹកនាំរបស់ក្លិប។ សប្តាហ៍ក្រោយ ខ្ញុំនឹងនិយាយជាមួយ Real Madrid ដោយផ្ទាល់ ហើយខ្ញុំនឹងសម្រេចចិត្តនៅពេលនោះ។”
បន្ទាប់ពីរដូវកាលដែលមិនអាចឈ្នះពានណាមួយ និងបញ្ចប់ក្រោម Barcelona នៅ La Liga, ប្រធានក្លិប Florentino Perez ចង់ធ្វើការផ្លាស់ប្តូរយ៉ាងឆាប់រហ័ស ដើម្បីនាំយកវិន័យ និងស្មារតីអ្នកឈ្នះត្រឡប់មកកាន់ក្រុមវិញ។
របាយការណ៍ជាច្រើនបានបញ្ជាក់ថា Real Madrid គ្រោងប្រកាសតែងតាំង Jose Mourinho ជាគ្រូបង្វឹកថ្មីនៅសប្តាហ៍ក្រោយ បន្ទាប់ពីការប្រកួតចុងក្រោយនៃរដូវកាលទល់នឹង Athletic Club។
