Luke Shaw ភ្ញាក់ផ្អើលនឹងរបៀបរស់នៅរបស់ Cristiano Ronaldo និងចិត្តចង់ឈ្នះដ៏កាចសាហាវរបស់ Zlatan Ibrahimovic

ខ្សែការពារ Manchester United គឺ Luke Shaw បានបង្ហាញអំពីកីឡាករដែលមានឥទ្ធិពលខ្លាំងបំផុតលើអាជីពរបស់គេនៅ Old Trafford ដោយលើកសរសើរពីភាពអាជីពដ៏អស្ចារ្យរបស់ Cristiano Ronaldo និងចិត្តឈ្នះដ៏ខ្លាំងរបស់ Zlatan Ibrahimovic។

ក្រោយចំណាយពេលជាង 10 ឆ្នាំជាមួយ Manchester United, កីឡាករជម្រើសជាតិអង់គ្លេសរូបនេះ បានរួមលេងជាមួយតារាបាល់ទាត់ល្បីៗជាច្រើន ហើយគេបានសារភាពថា Ronaldo គឺជាមនុស្សដែលធ្វើឱ្យគេចាប់អារម្មណ៍បំផុត។

Shaw បាននិយាយថា៖ “ខ្ញុំមានសំណាងណាស់ដែលបានលេងជាមួយកីឡាករល្អៗជាច្រើន ប៉ុន្តែម្នាក់ដែលលេចធ្លោជាងគេគឺ Cristiano Ronaldo។ អ្នកអាចមើលឃើញភ្លាមៗថា ហេតុអ្វីគេអាចស្ថិតនៅកំពូលបានយូរបែបនេះ”។

គេក៏បានបន្ថែមថា របៀបរស់នៅ និងការរៀបចំខ្លួនរបស់ Ronaldo មុន និងក្រោយហ្វឹកហាត់ គឺជារឿងដែលធ្វើឱ្យគេភ្ញាក់ផ្អើលខ្លាំង។ “ការមើលឃើញពីរបៀបដែលគេរស់នៅ និងការលះបង់របស់គេ គឺពិតជាអស្ចារ្យណាស់”។

ក្រៅពី Ronaldo, Shaw ក៏បាននិយាយអំពី Zlatan Ibrahimovic ដែលបានផ្ទេរមក Manchester United ក្នុងឆ្នាំ 2016។ គេបានសរសើរថា ខ្សែប្រយុទ្ធស៊ុយអែតរូបនេះមានចិត្តចង់ឈ្នះខ្លាំងបំផុតម្នាក់ដែលគេធ្លាប់ជួប។

Shaw បាននិយាយថា៖ “ខ្ញុំមិនដែលឃើញអ្នកណាមានចិត្តចង់ឈ្នះដូចគេឡើយ។ សូម្បីតែការប្រកួតតូចៗក្នុងការហ្វឹកហាត់ គេក៏ចង់ឈ្នះដែរ។ បើអ្នកនៅក្រុមគេហើយចាញ់ អ្នកប្រាកដជាដឹងថាគេមិនសប្បាយចិត្តឡើយ”។

គេក៏បានពិពណ៌នាថា Zlatan គឺជាមនុស្ស “aggressive” ខ្លាំង ប៉ុន្តែជាបុគ្គលសំខាន់ម្នាក់ដែលក្រុមត្រូវការនៅក្នុងបន្ទប់ផ្លាស់សម្លៀកបំពាក់។ “គេជាតួអង្គដ៏អស្ចារ្យ ហើយគ្រប់គ្នាស្រឡាញ់គេ”។