Raphinha បង្ហាញថា គាត់ធ្លាប់ទទួលសំណើពីក្លិបធំៗនៅទីក្រុងឡុងដ៍ មុនសម្រេចចិត្តផ្ទេរទៅ Barcelona
អត្ថបទសរសេរដោយ Danny • 5 views
ខ្សែប្រយុទ្ធស្លាបរបស់ Barcelona គឺ Raphinha បានបង្ហើបថា គាត់ធ្លាប់ទទួលបានសំណើធំៗពីក្លិបនៅទីក្រុងឡុងដ៍ មុនពេលសម្រេចចិត្តចាកចេញពី Leeds United ទៅកាន់ Spotify Camp Nou ក្នុងឆ្នាំ 2022។
ក្នុងបទសម្ភាសន៍ជាមួយ TNT Sports Brasil កីឡាករជម្រើសជាតិ ប្រេស៊ីល វ័យ 27 ឆ្នាំរូបនេះ បាននិយាយថា៖
“ខ្ញុំមានសំណើពីក្រុមពណ៌ខៀវ និងក្រុមពណ៌ក្រហមនៅឡុងដ៍ ប៉ុន្តែការសម្រេចចិត្តល្អបំផុតក្នុងអាជីពរបស់ខ្ញុំ គឺការចុះកុងត្រាជាមួយ Barcelona”។
សារព័ត៌មានជាច្រើនជឿថា ក្លិបដែល Raphinha ចង់សំដៅគឺ Chelsea និង Arsenal ដែលសុទ្ធតែចង់នាំគាត់បន្តលេងនៅ Premier League។
ទោះបីជាមានការផ្តល់ជូនធំៗពីអង់គ្លេសក៏ដោយ Raphinha បានជ្រើសរើស Barcelona ព្រោះគាត់ចង់ដើរតាមគន្លងរបស់វីរបុរសប្រេស៊ីលដូចជា Ronaldinho និង Neymar នៅក្លិបយក្សកាតាឡាន់នេះ។
ចាប់តាំងពីផ្ទេរមក Barcelona គាត់បានក្លាយជាកីឡាករសំខាន់ម្នាក់របស់ក្រុម និងជួយក្លិបទទួលបានជោគជ័យជាច្រើនក្នុងស្រុក។ ទោះបីប្រឈមនឹងការប្រកួតប្រជែងខ្លាំង និងពាក្យចចាមអារ៉ាមអំពីការផ្ទេរក៏ដោយ Raphinha បញ្ជាក់ថាគាត់នៅតែប្តេជ្ញាចិត្តពេញលេញជាមួយ Barcelona។
ក្រៅពីនិយាយអំពីអនាគតរបស់ខ្លួន Raphinha ក៏បានបង្ហាញថា កីឡាករដែលគាត់ចង់លេងជាមួយបំផុតគឺខ្សែប្រយុទ្ធ Harry Kane របស់ Bayern Munich។
“គាត់មានការឈរទីតាំងល្អណាស់ លេងបានល្អ និងរកគ្រាប់បាល់បានច្រើន។ ខ្ញុំចាត់ទុកគាត់ក្នុងចំណោមកីឡាករកំពូលៗ។ គាត់ជិតឈានដល់កម្រិតអច្ឆរិយៈហើយ” Raphinha បាននិយាយ។
