Vincent Kompany និង Bayern Munich រំខានផែនការសណ្ឋាគារស្នាក់នៅរបស់ PSG ដែលពួកគេចូលចិត្ត មុនការប្រកួត Champions League ហើយត្រូវប្ដូរទីតាំងជាបន្ទាន់
អត្ថបទសរសេរដោយ Danny • 7 views
ក្រុម Paris Saint-Germain (PSG) ត្រូវបង្ខំចិត្តផ្លាស់ប្ដូរសណ្ឋាគារនៅទីក្រុង Munich មុនការប្រកួតជើងទី២ Champions League វគ្គពាក់កណ្តាលផ្តាច់ព្រ័ត្រ ទល់នឹង Bayern Munich បន្ទាប់ពីក្លិបអាល្លឺម៉ង់មិនព្រមចាកចេញពីទីតាំងស្នាក់នៅដែលពួកគេចូលចិត្ត។ ស្ថានការណ៍នេះបានប៉ះពាល់ដល់ផែនការធ្វើដំណើររបស់ PSG និងកាត់បន្ថយអត្ថប្រយោជន៍ផ្លូវចិត្តមួយសម្រាប់ក្រុមបារាំង។
យោងតាមប្រភព Football365 ក្រុមរបស់ Luis Enrique មានគម្រោងស្នាក់នៅសណ្ឋាគារ Infinity Hotel ដែលស្ថិតនៅ Unterschleissheim ចម្ងាយប្រហែល ១៥ នាទីពី Allianz Arena។ ទោះយ៉ាងណា Bayern Munich បានសម្រេចរក្សាទុកសណ្ឋាគារនោះសម្រាប់ខ្លួនឯង មុនការប្រកួតសំខាន់នេះ។
ការសម្រេចចិត្តនេះបានធ្វើឲ្យ PSG ត្រូវប្ដូរផែនការយ៉ាងបន្ទាន់ ខណៈពួកគេកំពុងព្យាយាមរកកៅអីទៅវគ្គផ្តាច់ព្រ័ត្រ បន្ទាប់ពីឈ្នះជើងទី១ 5 ទល់និង 4។ Vincent Kompany បានបញ្ជាក់យ៉ាងច្បាស់អំពីជំហររបស់ក្លិបថា៖ “វាជាទីក្រុងរបស់យើង! យើងនឹងស្នាក់នៅ Infinity”។ ខណៈដែល Christoph Freund ក៏គាំទ្រការសម្រេចចិត្តនេះ ដោយបដិសេធមិនបោះបង់ “សណ្ឋាគារផ្ទះ” របស់ក្លិបឡើយ។
សម្រាប់ PSG សណ្ឋាគារនេះមានអត្ថន័យពិសេសផងដែរ ព្រោះពួកគេធ្លាប់ស្នាក់នៅទីនោះក្នុងការប្រកួត Champions League Final 2025 នៅ Munich ដែលពួកគេបានឈ្នះ Inter 5-0 ដើម្បីលើកពាន។ ដូច្នេះ ការមិនអាចស្នាក់នៅទីនោះវិញ បានដកយកអារម្មណ៍សំណាង និងការចងចាំល្អមួយចេញពីក្រុមបារាំង មុនការប្រកួតដ៏សំខាន់នេះ។
